(( نبكـــــي ))
نبكي والدمعة حَرّاقـه …. شين فراقـه
مُر وذقت مرار مذاقه
نبكي
نبكي بالصدمة المفجوعة
حَرقه ولوعة
قلبي إطبّق بين ضلوعه
مش قادر نستاقظ نوعـــه
وهقت أوهاقه
خلعة وحٌزن عليـّـا تلاقى
نبكي
والدمعة حَرّاقـه …. شين فراقـه
مُر وذقت مرار مذاقه
نبكي
نبكي م الصدمة مش فايق
ماني رايق
غاطس في الهمّ ومضايق
حتى نفسي ما ني طايق
فيها إعاقة
مكسورة كسرة شقاقة
نبكي
والدمعة حَرّاقه …. شين فراقـه
مُر وذقت مرار مذاقه
نبكي
نبكي والصورة في بالي
كُل حياتي معاه مشت
ماني مصدق يتهيالي
فـ لحظة قالوا عليوة مت
بدي دمعي نازل شتوالي
تقول وادي م السدّ فلّت
ونار فـ جاشي خلالهالي
صهدتلي الكبدة وارقت
بديت نبكي بالصوت العالي
ياريت عويناتي عمت
إن شاء الله في الجنة يا غالي
معاه تتلاقى
نبينا وأصحابه ورفاقه
نبكي
والدمعة حَرّاقـه …. شين فراقـه
مُر وذقت مرار مذاقه
نبكي
نبكي وماني مصدق حاجة
لين شبحتك بام عيوني
راقد ومغمض لعيون
مش طايق نفسي نتلاجى
إن شاء الله ربي يكون ف عوني
ويلطف بينا رب الكون
وناري في جاشي وهّاجة
تشعل براني ودكنوني
تقولي شاويني فـ كانون
رٌكبت فيا تقول عجاجة
لا تستهزوا لا تلوموني
وجهي مخضب لون بلون
عيوني مفلوته لواجه
فاقد روح زهايا وكوني
إللي بعد فراقه بلهون
الصيت اخلاقه
يا بنداقة
بيت تمزق كُل ارواقه
نبكي
والدمعة حَرّاقـه …. شين فراقـه
مُر وذقت مرار مذاقه
نبكي
مع تحيات / الشاعر أشرف الزرقاني
( أسير النجع)
10 / 5 / 2025 م
( السنوية الأولي لرحيل أخي الغالي)
توفي يوم 10 / 5 / 2024 م
الساعة الحادية عشر صباحاً
ودفن جثمانه الطاهر 11 / 5 / 2024 م
اللهم اغفر له وارحمه ونور قبره
وألهمنا الصبر والسلوان على فقدانه
((إستاحشتك يا عليوة ))
قد يهمك أيضا:
فرح الربيع لمن له ارض وليس لمن يبيع .. كيف يستقبل الشعراء فصل الربيع
قصيدة شعر: قابلة الشرر.. للشاعرة جيهان لطفي ابراهيم
ما هي أُصول عماد الطرابلسي وزير الداخلية الليبي؟
